ومازلنا نستكمل قصتنا الشيقة والمخيفة والمتعلقة بعالم السحر والشعوذة
قصة بوابة الجحيم (الجزء الثاني)
كنت باقول ممكن يكون مرض جلدي بس اللي خلاني اغير رايي انا بدات احس بنفس بيبقى حواليا في كل مكان انا تكلمت مع ماما في الموضوع ده كانت بتكلمني وبتقول لي ما تخافيش .
مرت ايام كثير والموضوع بقى بيزيد صعوبه لدرجه اني بدات اكره خطيبي كنت دائما بحس اني مش عايزه اشوفه او اسمع صوته وكل ده ما فيش سبب واضح.
ومن بعدها بدات اخس وجسمي بقى في النازل حتى ملامح وشي كان باين عليها التعب بقى في سواد تحت عيوني وكل ما الوقت يعدي الموضوع بيبقى اصعب من الفتره اللي قبله لدرجه ان كل اللي موجودين حوالين منى ابتدوا يلحظوا التغيير المفجاء في حياتي.
بعدها كنت بحب افضل لوحدي على طول ومش عاوزه اتكلم مع اي احد حتى خطيبي قررت ان فسخ الخطوبه معاه وكنت متمسكه ان افسخ الخطوبه ومن بعدها و بدئت اشوف خيالات لونها اسود حاجه شبيهه للدخان وكنت دايما بحس ان في حد حوالين مني بيحاول يكلمني بس مش عن طريق الصوت عن طريق افكار كانت بتجي جوه دماغي.
كنت بسمع جوه دماغي حاجه بتقول لي انت بتاعتي ومش هتكوني لحد ثاني جسمك ملكي اقبلى انك تكوني معيا وانا هاخليكى ملكه على الارض ولو رفضتي هتبقى اخترتى انك تعيشى الجحيم كل دي كانت مجرد عن افكار غريبه بتيجي جوه دماغي..
انا ما اعرفش ازاي كنت بحاول اتكلم عن طريق الافكار واقول انا مش ملك حد وجسمي ملكي انا بس انا في الوقت ده كنت بحس ان جسمي بيسخن بجد كنت وصلت لمرحله الجنان لحد اليوم اللي شفت فيه اكثر موقف مرعب حصل في حياتي واللى بسببه عرفت ان انا مش مجنونه وان كل اللي بيحصل ده حقيقي .
في يوم كنت قاعده في الاوضه بتاعتي كالعاده وقفله الباب وكنت قاعده على السرير بدات احس ان في ايد بتلمس شعري و نفس كان سخن جدا وراء ظهري لفيت وشي وانا بقول اعوذ بالله من الشيطان الرجيم شفت منظر مرعب خلاني مش قادره اعمل حاجه غير ان اصرخ اصرخ اصرخ بصوت عالي .
المنظر المرعب اللي شوفته قصادي كان مخلوق شكله مخيف وشه كان عباره عن دم لحم مش مكسى جلد عينيه كانت عباره عن سواد وبعدها ما حستش باي حاجه غير و امي تصحيني بدات احكي لامي كل حاجه بس امي كانت بتقول لي ان انا كنت نايمه واكيد ده كابوس انا حلفت لها انا كنت صاحيه مش نايمه اللي شفته ده حقيقي
ماما بدات تهديني وتقول لي خلاص انا هنام جنبك النهارده و بكره ان شاء الله نروح للراجل اللي فك لك العمل قبل كده هو اكيد هيعرف يقول لنا ايه اللي بيحصل ده .
وعدى اليوم وانا نايمه في حضن ماما وثاني يوم صحينا من النوم ورحنا للراجل الدجال ده. الغريب المره دي انا اول رجل ما افتح لنا الباب ملامح وشه كانت مرعبه وبعدها رجع بسرعه ورمي بخور في المنقد اللي كان موجود على الارض وبدا يقول كلام غريب مش مفهوم حسيت اللحظه دي بحركه غريبه جوه بيت الراجل ده كنت اول مره اعيش في الرعب والخوف ده.
وبعد شويه بدء يقول لي انتى عاشقك مارد من العالم السفلي يهودي قوي وقليل اللي هيعرف يقدر عليه .
ماما بدات تقول له طب وايه العمل يا شيخنا ..
الموضوع صعب ولازم بنتك يبقى قلبها جامد لو عايزه العشق ده ينتهي.
امي قالتله تحت امرك في اي حاجه يا شيخنا .
الرجل قال لها تمام النهارده بالليل هتيجي انت وبنتك وهنروح احنا الثلاثه على المقابر و هنزل انا وبنتك جوه القبر وهندبح قطه وهندهن بدمها وش بنتك وبعد ثلاث ايام هنرجع المقابر ثاني لو القطه مش موجوده يبقى المارد الموجود في المقابر هيقدر يساعدنا وبنتك هترجع كويسه.
انا بعد ما سمعت الكلام ده كنت باقول له لا انا مش هاعمل كده مهما حصل انا كنت حاسه برعب وخوف مش قادره اوصفهم .
بس الراجل قال لي ما فيش حل ثاني وما حدش هيقدر على العاشق ده غير المارد اللي ذيه ...
المهم خرجنا من عند الراجل وانا مصممه ان انا مش هاعمل كده مهما حصل بس امي كانت بتقولي جمدى قلبك عشان نخلص من الموضوع ده.
المهم بالليل سمعت كلام ماما ورحنا عند الراجل ده كان فعلا مجهز قطه لونها اسود ورابطها وكانت صاحيه ورحنا سوا المقابر وقف عند قبر معين وقال لي امي خليكى هنا وبدا يمسك ايدي و ينزل بيا القبر.
انا مش قادره اوصف لكم احساس الخوف والرعب اللي انا كنت فيه انا كنت حاسه ان انا مش هطلع من القبر ده سليمه المهم جمدت قلبي والراجل بدا يذبح القطه جنب جثه موجود على الارض وبدا يمد ايده ويغرقها في دم القطه وهو بيقول كلام مش مفهوم وبعدها دهن وشي من الدم ده انا فضلت اصرخ لحد ما وقعت على الارض وفقدت الوعي.
فوقت لقيت نفسي في بيت الراجل ده وبدء يقول شويه كلام غريب وبعد ما خلص قال لنا بعد ثلاث ايام هتيجوا هنا عشان نروح نفتح القبر من ثاني ونخلص من العشق ده للابد.
يتبـــــــــــــــــــــــــع