في البدايه عاوزك قبل ما تقرا حرف واحد من قصتنا تكون متاكد ان اللي هاحكي ده تجربه مخلوطه بوحي الخيال. .
قصه اليوم حصلت ولسه هتحصل كثير طول ما احنا بعيد عن ربنا قصه النهارده لبنت عندها 28 سنه بتبدا كلامها وتقول انا مش هاقدر اقول لكم على اسمي بس كل اللي اقدر اقوله لكم عليه ان عشت تجربه مرعبه كنت انا السبب فيها...
قصة بوابة الجحيم (الجزء الأول)
بدايه الحكايه لما وصلت ل 27 سنه رغم انا جميله المظهر ومتعلمه ومن عيله محترمه بس لحد النهارده ما اتجوزتش.
انا اتخطبت ثلاث مرات و كل التجارب الخطوبه اللي قبل كده كانت مش بتم والاسباب كانت غير معروفه انا كنت مسلامه امري لله وبقول كل شيء قسمه ونصيب.
لحد اليوم اللي واحده صاحبتي كانت قاعده بتتكلم معايا وبتقول لي يا بنتي انت ممكن يكون معمول لك عمل ولا حاجه رغم ان انا ما كنتش مقتنع ب السحر والشعوذه بس هي قدرت تقنعني وقالت كمان انها تعرف واحد كويس قوي حد يقدر يساعدني لو انا فعلا معمولي عمل او سحر .
المهم اقتنعت بكلامها وماما كمان اقتنعت وحددنا يوم بعدها ان نروح للراجل ده .. اليوم اللى رحنا عند الراجل فيه حصلت حاجة غريبه شوية..
اول حاجه الراجل عرف اسمي واسم امي من غير ما حد يقول له وبعدها بشويه قرب مني و حاطط ايده على دماغي وفضل يقول شويه كلام مش مفهوم وكان بايده الثانيه بيرمي بخور في منقد نار محطوط على الارض وبعدها بقى يقول لي انتى معمولك عمل من حد قريب منك عشان ماتتجوزيش والعمل ده سببه الغيره.
وبعدها الراجل رجع قعد مكانه مسك ورقه وريشه وكان معه حبرا لونه احمر وبدء يكتب على الورقه حروف ورموز وكلام غريب بدا يرسم رسمه عروسه في نص الورقه وبعد كده بدا يطبق الورقه دي على شكل مثلث صغير وحطها في حته قماش وبدا يخلصها وبعد كده قال لي امسكي الحجاب ده وخليه دائما متعلق في رقبتك عشان العمل اللي معمول لك يتفك وما يرجعش ثاني.
انا مشيت من عند الراجل ده انا وماما انا مستغربه ان ما فيش كلمه واحده الراجل ذكر فيها ربنا يبقى ازاي ممكن يكون علاجي عن طريقه بس صاحبتي قدرت تقنعني ان الراجل ده عنده خدام كتير من عالم الجن وهم اللي بيساعدوا يفك اي عمل او سحر.
بكلام صاحبتي و ماما انا اقتنعت وفعلا لبست الحجاب ده في رقبتي .
رغم اني كنت مش مقتنعه تماما بس اللي حصل بعد كده خلاني اغير رايي وصدق ان انا فعلا كان معمول لي عمل.
اللي حصل ان بعد شهر ونص تقريبا اتقدملي عريس والغريب ان الخطوبه تمت بكل هدوء وما كانش فيها اي مشكله لدرجه ان انا صدقت ان الراجل ده كان كلامه صح وان هو قدر يفك العمل .
المهم الخطوبه تمم بخير وكنت عايشه حياه جميله جدا جدا جدا وخطيبي حد محترم وطيب جدا . انا بدات احبه مع مرور الوقت لحد اليوم اللي ربنا بعت لي رساله تعرفني ان انا عملته ده كانت اكبر غلطه ارتكبتها في حياتي واللي بسببها عشت تجربه بجد صعبه ومرعبه...
المرحله الصعبه دي بدات بكوابيس بس ما كانتش مرعبه معظمها كانت عباره عن احلام جنسيه بس الغريب في الموضوع ان الشخص اللي بيبقى موجود في الحلم ده بيبقى خطيبي بس الحمد لله انا دايما في احلامي كنت باقول له اصبر لحد الجواز ومقدرش يلمسني ...
كل ده كان بالنسبه لي حاجه شبه طبيعيه عشان انا فعلا كنت بتمنى اتجوز في يوم من الايام قلت اكيد العقل الباطن اللي بيتسبب في الاحلام دي بس مع مرور الوقت الرعب بدا يزيد .
اوقات كنت بصحي من النوم الاقي خرابيش كثير على جسمي واوقات كنت بشوف كدمات باكثر من لون اوقات بيبقى لونها ازرق واوقات بيبقى لونها احمر اوقات بتبقى عباره عن كدمات لونها اسود في بدايه الموضوع ما كنتش خايفه ..
يتبـــــــــــــــــــــــــع